| |
|
| GABAY: Maxamed Deeq "Haldhaa" oo tixdan gabayga ah ugu jawaabaya gabaygii Dr Cabdullaahi Spanish
|
Gabaygaa weyn ee Maxamed Deeq "Haldhaa" ayaa tixdan gabayga ah u tiriyay jawaab ku aadan gabay hore oo uu tiriyay ninka lagu magacaabo Dr Cabdullaahi Sapanish.
Cabdullaahi gabaygaad dirteed, duna gaarsiisay
Dadka kale ha joogee aniga, wuu i daakhilayee
Markii aan daalacday wadnuhu, wuu i doorsamayee
Dorraad shaliyo haddeer, daaro mana galinee
Darintii la ii dhigay barkimo, diiday dhinaciiyee
Sheekhyadu ku daakire sidaan, daal ku soojeeday
Dibnahayga dheef uma furoo, layba dacareeyee
Dacaamkii la ii dhigay anaan, dooninoon rabinee
Wax la dubiyo raashinkii, layba dacreeyee
Hadh dugsoon anigaan galinoo, daayay noloshiiyee
Duhirkii baqoolaha intaan, doowga kor u qaaday
Oon duurka xulay baan jar dheer siiba daadegayee
Dariiquba wuxuu ii ahaan, dowyo godod dheeree
Qalbigay dillaacsamay markaan, dayay dhulkeeniiye Sida adi laguu daaray baan u danqanayaayee
Doofaarta raacdiyo axmaar, qoodhi daba taagay
Ninkii aan ka durkin iblays, dabala� weeyaanee
Waxba diihaanyo ciil, dibnaha hays gooynin
Duni waa wareegtaa sidii, damalka hooskiisee
Nabsigii diinku sidayee, waayo soo daahay
Maruubuu daf soo oranoo, daaha yuurariyee
Axmed gureey ragguu duuliyiyo, duubcadad jamani
Sayidkiyo darwiishkuu sengaha, dookhu kuu tabayo
Maruun bay ka daahiri arlada, doog sidiisiiyee
Maruunbaan diyaaradaha laliyo, miigyo soo diriyee
Maruunbaan intaan xamar daf dhaho, aan ku daakiriye Dekaddii Markaadiyo marbaan, Jawhar soo degiyee
Da� yartiyo shabaabkiyo, wixii dumar haweenaada
Sidii Darwiishkii intaan, duub cad wada siiyo
Maruunbay dushaa uga dhici, daabbad orad weynee
Shanta kala dab raacdee, laysku dari waayay
Maruunbuu Allaha daa�imkaa, isku soo duwiyee
Melazahaa dayuuska ahiyo, eeyda daba taagan
Maruunbaan intaan dacay ka xiro, aan dullaysaniyee
Fanax durugtay Geedigaas lihiyo, doxorrayaashiisa
Diinnaari Ina Yeey iyo, dowlad kuba sheegga
Maruubaan intaan dabin u dhigo, ay ku daadaniyee
Dadka yaga rafaadsan ee, diilalyadu hayso
Dhaxntiyo dabaylahaas, diifta uba yeelay
Maruunbaan intaan dogob u shido, ay ku diirsaniye
Mohamed-Deeq Abadi-madar �Haldhaa�
[email protected]
--------------------------
*Doofaarta Raacdiyo Amxaar
Gabaygii abwaan
Dr. Cabdullaahi Xasan Maxamuud
(Abdullahi Spanish)
Duq gaboobey goor ay hurdado, soo degdegiweydey Dirirkiyo haddii uu xidkaha, daawasho u aado Ama diillin-caanood saqdhexe, dawga socoteeyo
Inkastuu yaraan door ahaa, diiq bidhaansiguye
Hadba meesha uu dayo haddii, ciiro yare daahdo
Doobnimo la dhaafuu hammiga, dib u xasuustaaye
Aniguna sidii daran horweyn, waayo laga daahshey
Ay dalawadii jeel murkaha, daafta marinweydey
Oo dibir jidhaanliyo xareed, dooni aragooda
Axmed gurey raguu duuliyiyo, duubcad baan jamane Dabkii gurey xuseen iyo mataan, baygu soo duxiye Sayid iyo darwiish iyo sengaa, dookhu tebayaaye
Danabtii lahayd calangubiyo, faarax baan deyiye
Digrigii bashiir iyo xarbaa, daahir ii noqone
Xornimada kuwii loo deldeley, yaygu soo degiye
Sida hooyo door ay dhashiyo, saygi laga dooxay
Oo digasho waartiyo xumaan, lagu dambaysiiyey
Aan duudsigaa helay arkayn, cid u dadaalaysa
Dalkayagu ka oy labada gelin, diifta uu qabo e
Waa kaa ilmada duugayoo, diilalyuu dhimane
Darar iyo hadduu xoodh lahaa, waa dacgudhayaaye
Maatadan sidii kayn dab galay, ololku diiraayo
Oo dawladay dhawrayeen, maanta dabar goysey
Oo kii jidhkiisu u danqado, daalin lagu sheegi
Waa waxan damiirkiyo caqliga, nooga daadegine
Ninka shalay adoogaa dilee, adi ku soo doontay
U dulqaado waa ceeb hadaad, daawo leedahaye
Waa iga digniin ereyadaan, soo dawinayaaye
Dakhar iyo intii uumiyaha, doog la kiciweydey
Ama qolo dufowdoo xiskii, laga dabayl-raacshey
Ama calan la duuboo sidii, derinta loo laabay
Ama dunida reer door ahaa, dabin ku aynfaadey
Nin shisheeye soo daadahshaa, loogu dawgalay e
Qofka khaain daaniyo dhibkii, laga dahsooneeyey
Oo waa danaystee u fili, diric walaalkiis ah
Daabgudin ha fiirsado siduu, damal u naafeeyey
Onkod wuxu daryaamana afeef, diillin baw xigiye
Dabka dhibicda soo raacayaa, daray la qiiqaaye
Anna ararta waxan daaliyoba, dulucdu waa meele
Soomaali duugeed intuu, meel dayacan yaalo
Ama dalow afkii lagu wadiyo, daaman gudohooda
Uu doqon cadaawe u tashaa, dabarka qoolaayo
Marna toosa kama deynayiyo, weerka haw dagane
Kol hadday daruurtii cusbayd, darab biyaynweydey
Oo kaan cadaawe u dabnayn, duurka lagu toogtey
Oo diricyadeenii hawada, laga duqaynaayo
Oo duunyadii laga meteley, ururo duulaan ah
Aan degel fayow lagu ogayn, wabiyo daantooda
Inkastoo allaa daaimee, diifi nagu raagtey
Aan xeer na deeqiyo samaan, cidina diidaynin
Oo nabad duqodiyo wanaag, uunku wada dooni
Mar hadday dugaag keensadeen, duban carruurteena Oo diinta eebbiyo salliga, la isu diidaayo Oo talo intii door ahayd, xabashi loo daayey
Xaq la duugey feedhaa dambaa, laga dilaacshaaye
Haadkii abraha loo dalbaday, yaa ku soo degiye
Doofaarta raacdiyo amxaar, sow ka durug maaha?
Dr. Abdullahi Hassan Mohamud
(Abdullahi Spanish).
Email: [email protected] |
|
|
|
| |
|
|
 
|
