Home | Submit News | Forum | Contact

Muqdisho:-(pp)- Kadib markii horaantii Sanadkan la bililiqeystay Lafihii Meydadkii Talyaaniga ahaa oo laga soo faagay Qabriyadii ay ku aasnaayeen,ayaa hada la bilaabay in dib looga iibiyo dadkii bililiqeystay lafahaas.

Hadaba Shirkad loo xilsaaray inay dib u soo iibiso lafihii Talyaaniga ayaa laga furay Magaalada Muqdisho,kadib markii loo caal waayey in lafahaas dib loo soo celiyo,weerarka horaantii Sanadkan lagu qaaday Qabuuraha Talyaaniga ee Magaalada Muqdisho laguna soo faagay dhamaan lafihii duugoobay ee Talyaaniga,ayaa waxaa si weyn u cambaareeyay arrintan foosha xun,Dawlada Talyaaniga iyo Waxgaradka Soomaaliyeed taasoo keliftay in yax-yax iyo weji-gabax la soo gudboonaatay, magacii Bulsho-weynta Soomaaliyeed ee ku nool gudaha iyo dibedaba.

Hadaba Qeybtii ugu horeysay ee Lafihii Talyaaniga ayaa shalay laga dhoofiyay garoonka Belidoogle,kadib markii laga soo gaday dadkii horey u keydsaday. Lafahan ayaa waxaa u xilsaaran inay u dhoofiyeen Dalka Talyaaniga, sadex Xubnood oo uu Madax u yahay General Maxamed Nuur Galaal iyo Taliyaha Ciidamada Maxkamada Islaamka ee Ifka Xalane Adan Xaashi Ceyroow,oo isagu markii hore hormuud u ahaa Qolooyinkii amray in la bur-buriyo Qabuuraha Talyaaniga ee ku yaalay Magaalada Muqdisho.

Sidaas daraadeed markii ay dhacday in Shalay la ogaaday in Dayuuradii ugu horeysay ee lagu daabulo Lafahaas ay ka duushay Garoonka Belidoogle, ayaa waxaa ka bilaabatay Magaalada Muqdisho in dadkii horey u keydsaday lafaha Talyaaniga ay qiimihii cirka ku shareeraan,iyadoo hada uu marayo qiimihii ugu sareysay ee lakala siisto lafahaas,taasoo hakad gelisay hawshii lagu aruurinayey Lafahaas.

Shacabka Soomaaliyeed ee ku sugan daafaha Aduunka ayaa wel-wel ka muujiyay arrintan ugubka ah ee lagula kacay Meydadkii lafihii Talyaaniga,waxayna qaarkood muujiyeen in mustaqbalka la filan karo in aargudasho lagu sameeyo Meydadka Soomaalida ku aasan Dalka Talyaaniga iyo meelo badan oo aduunka kamida.

Xigasho: Xuseen Yaasiin Gode-Gode
Puntlandpost.com