Home | Submit News | Forum | Contact

Waraysi dhinacya badan taabanaya ayay Jaalliyada dibada (Yurub, N. America iyo S. Africa) ee gobolka Godey la yeelatay xildhibaan Abdi-Raaxo oo ah xildhibaan heer federal ah oo laga soo doortay gobolka Godey.

Xildhibaan A/raaxo waxaa uu warbixin dheer ka bixiyay dhamaan hawlaha Killilka sida dhinacyada dhaqaalaha, siyaasada, arimaha bulshada iyo horumarka Killilka gaar ahaana midka gobolka Godey.

Xildhibaan A/raaxo waxuu ugu baaqay Jaalliyada gobolka Godey inay dalka kusoo noqdaan si ay ugu kuur galaan xaalada dhabta ah ee taala gobolka, waxuuna ku booriyay aqoon yahanka, dhalinyarada iyo ganacsatadaba inay dalka maal gashadaan, islamarkaasna ay aqoontooda ugaga faa'iideeyaan dadka iyo dalkaba.

Dhinaca kale mudane A/Raaxo waxaa uu sheegay in dhaqaalle badan oo cusub loo filayo labada mashruuc ee waaweyn West-Godey iyo South Godey, loona baahan yahay dad aqoon leh oo ka qayb qaata horumarka gobolka. Sidoo kale, waxuu ku nuux-nuuxsaday in haddii dadka gobolka u dhashay ee aqoonta leh dalka kusoo noqdaan ay suurta gal tahay in baahida jirta ay dabooli karaan isku filaansha dhinacyo badan ahna la gaadhi karo.


Kadib warbixintaa waxaa Jaalliyada dibada ee gobolka godey u suurta gashay inay su'aalo waydiiyaan xildhibaanka su'aalahaas oo ay kamid ahaayeen waxa looga baahan yahay Jaalliyada dibada ee gobolka, iyo sida ugu macquulsan ee Jaaliyadu uga qayb qaadan karto horumarka gobolka.

Jaalliyada gobolka Godey waxay muujisay sida ay uga xun tahay dhibaatada xaalufinta iyo nabaad guurka dhulka lagu hayo (enviromental disaster), sida jarida dhirta, waxayna ku adkaysay maamulka gobolka in loo hawl galo siddii looga hortagi lahaa arinka xaalufinta dhulka, taasoo labada dhinacba ay isla garteen in si deg-deg ah wax looga qabto oo dadweynaha laga wacyi galiyo khasaaraha iyo dhibaatada badan ay keenayso jaridda geedaha.

Waxuuna mar labaad ku celiyay waa inay wadankii kusoo noqdaan dadka aqoonta kala gedisan leh ee dibadaha ku noool, kuwaasoo ka qayb qaadan kara horumarinta qaybaha kala gedisan ee arimaha bulshada.

Halku dhaga maanta ee dhirta - Geed ninkii jaraa Geel halaga qaado!

Kuwa geyigi aadayow, reer Godey gabaygan gaadhsiiya

Gunimo haddaad rabtaan geedka wada gooya

Gaajo hadaad rabtaan geedka wada gooya

Gacal la'aan hadaad rabtaan geedka wada gooya

Guul daro haddaad rabtaan geedka wada gooya

Galow inuu idinku ciyo hadaad rabtaan geeka wada gooya

Haddii kale Geed ninkii jaraa Geel halaga qaado!


Waraysigaas iyo wada tashigaas horumarinta Gobalka Godey ayaa ku dhamaaday jawi aad u wanaagsan, kadibna Jaalliyada gobolka Godey waxay magacawday gudi gaar ah oo kumeel gaadh ah oo u kuurgala, baadhitaana ku sameeya baahida gobolka, isla markaasna soo diyaariya qorsha dheer oo loogu hawl galayo horumarinta Gobolka Godey.

Xildhibaan A/raaxo waxaa uu sheegay in hal kudhaga maanta ee shacbiga gobolka Godey uu yahay "Aynu beer falano aan ku baahi baxnee".

"Aynu beer falano aan kubaahi baxnee"

"Aynu beer falano aan kubaahi baxnee"

"Aynu beer falano aan kubaahi baxnee"



Maamulka GodeyNews waxaa uu diyaar u yahay inuu taageero buuxda siiyo walaalahooda u ol-olaynaya sidii loo horumarin lahaa arimaha bulshada ee Gobalka Godey, maadaama uu gobalkan noqon karo midka ugu khayraadka iyo dhaqaallahaba badan, marka loo fiiriyo goballada kale ee Killilka Soomaalida.

GodeyNews Staff,
ShariifBadel