Home | Submit News | Forum | Contact

Doorashada baarlamaanka wadanka Kenya ayaa la filayaa inay dhacdo 2 sano kadib, hase yeeshee waxaa la yaab noqotay markii ay musharaxiin fara badan ay bilaabeen hawlahoodii qaban qaabada doorashada sida shirar ay ku qabtaan deegaanada ay rabaan in laga soo doorto.


Tusaalle ahaan waxaa 22/12/05 Magaalada Gariissa ka dhacay shir uu soo abaabulay musharax lagu magacaabo Aden Barre Ducaalle oo raba inuu 2007 la tartamo Mudane Hussein Maalim oo in ka badan 25 sano laga soo dooranayay (Dujis) Garissa. Musharaxan ayaa ah nin ka dhashay qoys caan ah oo dhaqaalle badan iyo magacba ku leh Kenya gudaheeda khaastan Magaalada Garissa. Waa nin da'a yar oo mutacalim ilaa iyo heer jamacadeed ah, hadana ka mid ah madaxda dekada Mombasa. Musharax Aden Barre ayaan ka fogayn (Qoys ahaan iyo Qaraabo ahaanba) reerka Hussein Maalim oo in badan hogaaminayay siyaasadda Somaalida Gobalka Waqooyi Bari Kenya.

Sidoo kale waxaa la filayaa in bilahan soo socda ay rag badan oo rajo ka qabo inay tartamaan ay bilaabaan shirar iyo is aragyo ay dadwaynaha la yeelanayaan. Dadka la filayo inay musharax-nimadooda muujiyaan ayaa waxaa kamid ah; Ilyaas Barre Shiil(Fafi const) Farax Macalim (Lagdera const) labadan nin ayaa sumcad dheeraad ah ku helay doorashadii lagu diiday dastuurkii cusbanaa, waxayna ahaayeen dadka dhanka soomaalida hogaaminayay codadka diidmada dastuurka cusubnaa.

Laga soo bilaabo xiligii ay dadweynaha wadanku diideen dastuurkii cusbaa ay waxaa wadanka ka bilaamay hardan siyaasadeed oo ka dhashay qaabkii iyo sidii ay dawladda Kibaaki u maamushay dastuurkii la diiday iyo walina magacaabidda golihii wasiirada ee dawladda oo aan illaa iyo hadda aan u muuqan mid qanciyay dadweynaha wadanka oo ka andacoonayay maamul xumo iyo hantidii wadanka oo dad yar dhunsadaan.

Hadaba waxaa soo badanaya dadka taageersan rayiga mudane Raila Odinga ee ahaa inay dawladdu qabato doorasho degdeg ah, hadii kale wadanka qalaalase kama baxayo illaa iyo inta la gaarayo doorashada wadanka ee 2007. Waxuu kaloo digniin Odinga usoo jeedayay mudanayaasha Kibaaki dawladiisa taageeray in markii la gaaro xiliga doorashada barlamaanka ay dadweynaha kala kulmayaan caawiqib xumo iyo kursigoodooy lumiyaan, maadaama ay rabaan inay hirgeliyaan dawlad shacabkii ay matali lahayd uu diidmo qayaxan ka hor keenay.

Isku soo duuduuboo Siyaasadda Kenya ayaa ah mid aad u furfuran oo (Democracy ah) marka loo fiiriyo wadamada Geeska Africa oo intooda badani ay hareeyeen dagaallo ehli ah iyo siyaasad xumo ku salaysan kaligii talisnimo.


Axmed Noor
Godeynews.com,
Garissa.