Home | Submit News | Forum | Contact

Shir ay soo abaabuleen xubno muhiim ah oo ka mid ah jaaliyadda reer Godey ee wadamada Scandanevianka ayaa waxuu ka dhacay 26/12/05 magaalada Copenhagen ee wadanka Denmark.

Shirkaas ayaa waxaa lagaga hadlay arimo muhiim ah oo badan kooda xasaasi ah kuwaasoo khuseeya qaabkii iyo sidii ay jaaliyadaha dibadda ee deegaankaas wax uga qaban lahaayeen dhinacyada Waxbarashada, caafimaadka, Beeraha iyo sidii kor loogu qaadi lahaa dhamaan arimaha horumarinta bulshada ee deegaanka. Sidoo kale waxaa la isla qadaa dhigay qaabkii iyo sidii dar-dar loo galin lahaa dareenka iyo wax qabadka bulsha weynta ku nool qurbaha ee kasoo jeeda deegaanka Godey.

Xubnihii shirka iskugu imaaday waxay kaloo meeshaas ku dhagaysteen Abdiaziiz M.Layli oo warbaxin dheer oo heer sare ah wadankii ka keenay, isagoo in ka badan 2 sano dhulkii gudihiisa ku maqnaa maalgelina ku sameeyey dhinaca beeraha, ayaa waxuu si tafa tiran uga waramay hawlaha maal geliniyeed ee dhulka kasoo qabtay iyo sida uu dhulku guud ahaan u yahay dhul dihin oo aan helin dad dhab ah oo si fiican uga faa;iidaysta khayraadka iyo barwaaqada dhulka ku jirta, waa hadii ay noqon lahayd mid bisil iyo mid cayriin ahba.

Abdiaziiz ayaa in badan ku noolaa wadanka Denmark kuna dhamaystay waxbarashadiisa heer jaamacadeed oo qaybta Beeraha ah, hase yeeshee markii uu dhamaystay waxbarashadiisa ayaa isaga iyo labo nin oo kale Cumar Yusuf Qaladiid iyo Cabdrashiid Shuqul ay go,aansadeen inay dhulkii maalgelin dhanka beeraha ah ku sameeyaan waxayna magaalada Godey geeyeen qalabka beeraha oo ka kooban 20 matoor iyo illaa iyo 4 gaari oo lagu tala galay socodsiinta hawlahooda.

Waxaaa la isla gartay in si wada jir ah oo buuxda loo taageero arimaha horumarinta bulshada ee deegaanka Godey. Sidoo kalena ay wanaagsan tahay in maal gelin lagu sameeyo dhulkii oo hadii deegaan kastaba dadkiisa qurbaha jooga ay ku tartamaan maalgelinta dhulkooda ay sare u qaadi kari lahaayeen nolasha shacabka muddo gaabana wax badan iska badali lahaayeen arimaha horumarin la,aaneed ee ka taagan dhulka badankiis.


Godeynews Staff
[email protected]