Home | Submit News | Forum | Contact

Maalintii sabtidii 01-28-2006, ayaa waxaa ka dhacay magaalooyinka mataanaha ee gobolka Minnesota shir ay soo qaban qaabiyeen gudiga qaban qaabada ee mashruuca horumarinta Waxbarashada ee Qabridaharre shirkaas oo Jaaliyada Minnesota loogu warbixinayey wixii u qabsoomay mashruucu mudadii uu shaqeynayey.

Gudoomiyaha mashruuca Mudane Ahmed Cabdi Haybe ayaa wuxuu ammaan iyo boogaadin u soo jeediyey dhammaan intii ka qayb qaatey mashruuca, taagaradii iyo samafalkii ay la garab istaageen horumarinta waxbarashada Qabridaharre.

Gudoomiyuhu wuxuu ka warbixiyey wuxuu u qabsoomay mashruuca muddadii uu shaqeynayey iyo tallaabooyinkii uu qaadey iyo hada halka ay wax u marayaan, isagoo ku nuuxnuuxsadey baahida ballaadhan ee ka jirta magaalada Qabridaharre iyo siday mihiim u tahay in jaaliyadahu dhammaan ka qayb qaataan xalinta baahida badan ee jirta.

Shirkan oo ay ka soo qayb qaateen dhammaan qaybaha bulshada sida aqoonyahanada, dhallinyarada, culimada iyo waxgaradka jaaliyada Minnesota ayaa dhammaantood waxay soo dhaweeyeen dareenka horumarineed ee guddiga qaban qaabada Mashruuca Horumarinta Waxbarashada Qabridaharre meel kasta ooy joogaanba.

Aqoonyahanadii ka Hadley shirkaas waxaa ka mid ahaa Professor Maxamed Cabdi Xaaji �Gandhi� oo booqasho ku jooga wadanka Mareykanka, Minnesota isagoo tilmaamey inay talaabadani tahay mid wanaagsan dhaxal loo aayana ka tagi karta uuna xusuusiyey xubnaha mashruuca meel kasta ooy joogaan ineyna ka daalin shaqadan samafalka ah kuna booriyey jaaliyadu inay taageeradooda sii wadaan.

Gobolka Minnesota ooy dagan yihiin jaaliyad aad u ballaadhan ayaa guud ahaan mashruucan laga soo dhaweeyey isagoo mashruucu u shaqey doono qaab xubinimo ah si loo qiimeeyo xubnaha taageera horumarinta dalkii hooyo. Ugu danbeyntii, halkaa waxaa ka hadley dad fara badan iskuna raacay in loo guntada horumarinta dalkii hooyo lalana shaqeeyo gudiga qaban qaabada loona fududeeyo shaqadan ay u istaageen.

Gabagabadii shirka Bahda Horusocod ee mashruucan, xubnihii laf-dhabarta u ahaa ee ku kala nool aduunka dacaladiisa waxay mahad ballaadhan u celiyeen qurbo joogta u huray maalkoodii iyo maskaxdoodii walaalahooda ku nool magaalada Qabridaharre ee wakhtigu hayo waxayna xusuusiyeen inuu lama huraan yahay caws jiilaal.


Mahadsanidiin,

Qabridaharre Education project
Bahda horusocod