Home | Submit News | Forum | Contact

Wararka sida rasmiga ah Godeynews uga soo gaaraya dhanka magaalada JiJiga ayaa waxay xaqiijinayaan in mashruuca (State farm) loo fasaxey lacag dhan 2million Birr, taasoo loogu tala gelay in dib loogu dhaqaajiyo mashruuca koonfurta-Godey ama sidoo kale loo yaqaano (State-Farm).

Mashruucan ayaa in ka badan 4 sano xanibnaa oo aan loo qabanin wax miisaaniyad ah, sababtuna waxey ahayd masuuliyintii hadda kahor haysan jiray oo lagu sheegi jiray inay iyagu u sabab yihiin oo aysan dan badan ka lehayn baabitaanka mashruuca. Hase yeeshee isbedal fara badan ayaa ku imaaday mashruucan intii Maareyaha looga dhigay Maxamed Miraad Layli oo takhasus dheeraad u leh arimaha beeraha, isla markaasna dadaal fara badan geliyay dib usoo celintii iyo soo nooleyntii mashruuca oo ka kooban ilaa iyo 1820 hecter.

Miisaanayadan mashruuca hadda loo qabtay ayaa waxaa loogu tala gelay in dib loogu dayac tiro kala-badh kanaaladii biyaha ee illaa iyo 900hecter iyo waliba in dib loo soo iibiyo matooro yar yar ah loo qaybin doono dadka kujira iskaashatoyinka beeraha (state farm). Maadaama aysan ku filnayn miisaanyadda mashruuca loo qabtay inay dayac tiraan beeraha oo dhan, ayaa haddana waxaa lagu guda jiraa sidii loo xaraashi lahaa waxii hore oo qalab ah ee mashruucu leeyahay, kuwaasoo aan hadda isticmaal fiican u lehayn hawlaha mashruuca sida matooradii hore oo u badan 6 boston (6 cylinder) oo aysan iskaashatooyinku shidaalkooda xamili karin.

Sida la sheegayo waxaa miisanayadan badankeed loogu tala galay beeraha(Banka aw-danbay), sidii dib loogu sameyn lahaa kanaaladii oo badankood xabaalmay, maadaama aan la isticmaalin muddo aad u dheer. Hadaba markii la hagaajiyo kanaalada ayaa waxaa loo qaybin doonaa iskaashatooyinka beerahoodu ku jiraan 900 hecter ee hadda la diyaarinayo.

Iyagoo loo maal gelinaya mudana la taageerayo, kadibna waxaa laga filayaa inuu dadku isku filnaado oo ay iska dabaraan waxii kharash ah, sida shidaalka ku baxaya matoorada beeraha iyo kharashyada kale ee sanad walbaba ku baxaya hagaajinta beeraha.

Mashruucan ayaa taariikh ahaan ahaa midka kaliya ee ka hawl gala deegaanka Godey, xiligii Mingistu uu wadanka haystay, kasoo mararka qaar lahaa wax soosaar aad u badan intii aan lagu beerin suufka. Waxaa kaloo lagu xusuustaa waa meeshii la dejiyay dadkii kusoo wax yeeloobay abarahii 1974-75 dadkaasoo badankooda waagaas laga kala keenay deegaano ka fog magaalada Godey.


By Abdullaahi Bayaxow,
Godeynews.com
Godey.