Home | Submit News | Forum | Contact

Waxaa maalmahan danbe la isla dhexmaray warar sheegaya in Oday dhaqameedka Soomaalida Ogaadeeniya usoo bixi doonaan dibadaha si ay usii wadaan hawlihii nabad raadinta ee u dhexeeyay ONLF iyo dawladda Ethiopia.

Hadaba waxaan lawada soconaa inay dhawr mar hore odayada lakulmeen labada dhinac ee la rabo in la heshiisiyo, hase yeeshee xagee isku dayitaankaas ku danbeeyay, wax natiijo ahse ma kasoo baxday?

Markii aad dib u fiiriso dadaaladii hore waxaa kuusoo baxaya inaysan hawshan odayadu wax badan ka qaban karin, sababtoo ah waxaan wada ognahay mawqifka dawladda Ethiopia ee ku aadan arintan oo ah Jabhadu waxay dhibaato ku hayaan dhulkoodii iyo guryahoodii marka waa inaad idinku hawshiina xalisataan, hadii kale dib udhacaan ayaad waligiin ku jiraysaan. Dhinaca kale labada masuul ee ugu sareya Jabhadda ayaa waxay fagaarayaalka shirarka iyo ideecadahaba ka sheegeen inaysan dib danbe ula kulmeynin odayaasha dhaqanka, isla markaasna u arkaan kuwa aan qiimo badan ka laheyn agtooda, qaarkoodna waxayba ku tilmaameen inay ushaqeeyaan ciidamada Tigreega.

Sidoo kale waxaa in badan oo qurbaha ku dhaqana ay aaminsan yihiin inay Odayadu dhumiyeen fursad qaali ah oo waxtar badan u laahaan lahayd deegaanka. Odayadu waxay markii hore u istaageen arin muhiim ah oo la rabo in masiirka umadda lagu xaliyo, hase yeeshee markii danbe waxay ka dhamaan waayeen arimihii Kililka iyo sadbursi jago raadis.

Hadii aan wada xusuusano shirkii Godey ee Odayada iyo Dawladda dhexe waxay odayadu muujiyeen geesinimo, waxyaabahii ay ku hadlayeena waxay wada ahaayeen kuwa lagu wada diirsadey, oo taabanayay dhibaatooyinka dhabta ah ee deegaanka kajira. Hase yeeshee markii ay Addisababa u duuleen ayaa hawshii caynka laga rogay oo Odayadii qaarkood ayaa waxay ku dhaqaaqeen arimo wax u dhimiyay sharaftooda iyo qadiyadii ay lahaayeen waan u soconaa, sida inay Raisul wasaare Zenaawi weydiistaan inuu dad ugu daro baarlamaanka isla markaasna uu usii magacaabo jagooyin kale. Arintaas ayaa dad badan sheegaan inay khilaaf dhex dhigtay isla odayaaashii shirka markaas wada fadhiyay, sababtoo ah qaarka kale ayaa diidanaa inaan ujeedadoodii ahayd masiirka ummadda aan lagu leexinin jagooyin baarlamaan iwm.

Hadaba markii aad isku dardarto arimahaas oo dhan ayaa waxaa kusoo baxaya in Odayada imaanshahoodu uusan hadda lahayn muhiimad badan oo tii hore oo kale ah. Isla markaasna ay adeg tahay in safarkooda dibadda natiijo quman ay kasoo baxdo.


Omar Yare,
Godeynews Staff.