Home | Submit News | Forum | Contact

Waxaan wali dhexda kaga jirnaa barnaamijyadii aan in muddo ahba wadnay ee kusaabsanaa wax kabaro dhulkaaga hooyo. Hadaba sidaan markii horeba inii balan qaadnay waxaan barnaamijkeena maanta kusoo qadanaynaa magaalada xuduuda Soomaaliya kutaala ee Feer-feer oo caasimada ogaadeeyniya ee Godey qiyaastii ujirta 270km kagana beegan dhinaca Koonfur-Bari.

Hadaba hadii aad (Daily Flights) diyaaradda ah ee usocda Godey aad kasoo raacdo Diridawa waxaad 2 saac waxyar kadib ka dagaysaa Airportka Xiddidole-Godey. Islamarkiiba waxaad lakulmaysaa gaadiidka ukala goosha
gobolka Godey oo diyaar ku,ah garoonka oo hadii aad rabto hor uraaci. Hadii kale oo aad jeclaato inaad nasato maalinkaas waxaad ugudbi magaalada ood seexan. Maalinta xigta subaxii hore ayaad waxaad kusoo kalihi boostaajada baabuurta aadda dhinaca Koonfurta Soomaaliya oo ka hor baxa xafiiska deegaanka iyo booliska degmada hortooda, sida qaalibka isla markaasba ah waxaad heli baabuurta dheeraysa ee aada dhinaca magaalada Feer-Feer ee xuduuda ku taala.

Hadaba Feer-Feer waa magaalo sidee ah jawigeedu?

Feer-Feer waa magaalo jawegeedu uu lamid yahay magaalooyinka kale oo Gobalka Godey oo badankooda kuyaala hareeraha Webiga shabeele, laakiinse magaalada Feer-Feer mamaro Webiga Shabeela inkastoo uu maro deegaano hoos yimaada maamulkeeda, waxaase dhex mara Tog aad uweyn oo dadku xiliga barwaaqda beeraha ku beertaan.

Magaaladan oo da,deedu deegaameed weyn tahay ayaa hadana waxay ahayd muddo dheer furin dagaal oo udhexaysa Soomaaliya-Ethiopia sida dagaaladii 1977 - 1982. Kadib 1991 markii qaxii soomaaliya laga soonoqday waxay bilaabeen dadweynaha deeganku inay salka kadagaan oo ay si fiican udhistaan magaalada Feer-Feer muddo kayar kadibna waxay ku guulaysatay inay hesho aqoonsiga degmo buuxda oo kamid ah Gobalka Godey.

Degmada Feer-Feer ayaa waxaa laga soo doortaa 3 xubin oo kamid ah
baarlamanka deegaanka kana kala yimaada Burcukur, Dhagaxle iyo Feer-Feer. Halka midka fedaraalka ahna ay lawadagto degmooyinka kale ee Qalaafe iyo Mustaxiil oo hadda uu xubintaas baarlamaan loo doortay Mudane Suldaan Korfe Gaarane oo ah siyaasi caan ah oo in badan loosoo dooran jiray xubinimada baarlamaanka dhexe ee deegaankaas.

Meelaha caanka ah ee kuyaala degmada Feer-Feer waxaa kamid ah Burdhiinle oo hortiisana ay kutaalo beeraha lagu magacaabo (Xeero
amxaar). Waxaa kale oo kuyaala daaro lagu sheego in la dhisay xiligii boqor minelik oo layiraahdo (Dhiingay Minelik). Sidoo kale hadii aad dib soo aado iyo dhinaca Qalaafe waxaad soo mari (Maar-Magoog iyo Buur-Ukur), oo uu gumaysigii Talyaanigu kadhisay daar sedex dabaq ah kadibna xiligii xukunkii Ingiriiska lawareegay uuna dejiyay ciidan dhan 1500 oo Askari isagana waxuu isla meeshaas kadhisay 23 daar oo gaagaaban oo markii danbe ku burburay dagaaladii 1977 ee Soomaaliya iyo Ethiopia.

Nolosha dadweynaha degmada Feer-Feer ayaa caadi ahaan kutiirsan wax soosaarka beeraha iyo iyagoo xiriir wanaagsan oo ganacsi laleh magaalada Beletwyne oo kutaalla xaduudka Soomaaliya.

Sidoo kale mar ay Godeynews.com la xiriirtay nin culimo ah oo caan ah oo kasoo jeeda deegaanka Feer-Feer oo ladhaho Sheekh C/raxmaan Sheekh Diiriye oo jooga Godey ayaa waxuu carabka ku celceliyay in Ganacsatada iyo dadweynaha reer feer-feer ay dhinacyo badan kaga tiirsan yihiin oo xidhiidh wanaagsan la leeyihiin xarunta Gobalka Godey ee Godey oo hadda noqotay saldhiga xarunta ganacsiga ee deegaanka ismaamulka Soomaalida. Waxayna reer Feer-Feer diyaar u yihiin inay sii xoojiyaan xiriirka ay la leeyihiin deegaamada ku hareeraysan, khaastan inay sii xoojiyaan xiriirka iskaashi ganacsi iyo midka maamul ee kadhexeeya Gobalka Godey.

Qore Jaho-adag
Godeynews.com,
Godey.