Home | Submit News | Forum | Contact

Mashruuca Horumarinta Waraabka Galbeedka Godey ayaa shaaca ka qaaday in uu dhamaystiray diyaarinta dhul beereed dhan 780 Hektar oo ku yaala aaga galbeedka Godey.

Sida uu ku waramay Maareeyaha Guud ee Mashruuca Horumarinta Waraabka Galbeedka Godey, Mudane Axmed Mowsar Budul, wuxuu mashruucu wakhtiga xaadirka ah u qorshaysan inuu hirgaliyo diyaarinta dhul beereed dhan 1,000 Hektar oo dheeraad ah.

Dhinaca kale, waxaa Mashruuca barbar socda hawl gal ay fulinayaan Wasaarada Gaashaandhiga ee Qaranka taas oo diyaarinaysa dhul dhan 2,220 Hektar. Sida ay ku soo waramayaan Warar naga soo gaadhay Galbeedka Godey ayaa sheegaya in bilihii aan soo dhaafnay roobab baaxad leh oo da�ay ay khasaare u gaysteen hawlgalka mashruuca.

Roobabku waxay khasaare ba�an u gaysteen dhismayaasha kuwaas oo dumiyay dhismayaal sida bakhaaradii iyo guryihii shaqaalaha. Roobabkaasi waxay kaloo waxyeelo u gaysteen hanti kale sida kayd sibidh ah oo yaalay mashruuca. Dhinaca kale roobabkaasi waxay waxyeelo u gaysteen hawsha ciidamada qaranka ee diyaarinta dhul beereedka.

Maadaama uu mashruuca Horumarinta Galbeedka Godey uu yahay himilada dadaalka horumarka iyo gaadhista isku filnaansho xaga cuntada ayaa waxaa lagama maarmaan ah in fiiro gaar ah loo yeesho sidii looga midha dhalin lahaa mashruuca. Mudane Axmed Mowsar Budul wuxuu carabaabay in dhibaatada iyo caqabadaha la soo darsa ay badan yihiin. Mudane Mowsar wuxuu si gaar ah u tilmaamay in gaadiidku yahay dhibaatada ugu wayn ee haysata. In kastoon badnayn hadana gaadiidka waa kuwo shaqanayay mudo aad u fara badan isla markaana aan wax dayactir ah oo balaadhan lagu samayn.

Mudane Mowsar wuxuu sheegay jiritaanka dhibaatada gaadiidka, isaga oo intaas ku daray in shaqaalaha xirfada leh sida Engineerada IWM, ay ku yar yihiin goobtaas.



Waxaa Maqaalkan Qoray WARGAYSKA IFTIN ee ka soo baxa Deegaanka Soomaalida Cadadkii soo baxay Jimcihii 23/6/2024


Xigasho: Somalistate.com