Home | Submit News | Forum | Contact

Waxaa si daba joog ah warsidaha Godeynews usoo gaaraya warar rasmi ah oo sii xoojinaya qoraalkaanigii hore ee aan labo todobaad kahor kusheegnay in xubno sarsare oo kamid ah ururka ONLF laga saaray golihii dhexe, meesha gebi ahaanba xubno kale laga saaray golihii dhexe iyo xubinimadii ururka.

Wararka rasmiga ah ee Godeynews soo gaaraya ayaa sheegaya in isu geyn xubnaha laga saaray golaha dhexe ay tiro ahaan gaarayaan 11 xubnood oo 6 kamid ah lagusoo eedeeyay inay danbiyo kagaleen ururka. Meesha 5 kalena lagu soo eedeeyay inay gudan waayeen waajibaadkoodii, isla markaasna ay dayaceen masuuliyadoodii gole dhexenimo.

Magacyada 6 xubnood ee danbiyada lagu soo oogay ayaa waxay kala yihiin sidan;

1-Dr Maxamed Siraad Dolaal-----laga saaray xubinimadii golihii dhexe
2-Yuusuf Aden Taani--------------Laga saarey xubinimadii golaha dhexe
3-Maxamed Shariif----------------Laga saarey xubinimadii golaha dhexe
4-Sulub Cali Cabaas--------------Laga saarey xubinimadii golaha dhexe
5-Eng Salaxudiin Macow--Laga saarey golaha dhexe iyo tii ururkaba
6-Cabdullaahi Geelbeele--Laga saarey golaha dhexe iyo tii ururkaba

Sidoo kale waa kuwan magacyada 5 xubnood ee lagu sheegay inay kasoo bixi waayeen masuuliyadooda;

1- Axmed Ugaas Cabdullaahi--Laga saarey golihii dhexe
2- Cabdullaahi Ibraahim Biixi--Laga saarey golihii dhexe
3-Cabdi Cadood---------------Laga saarey golihii dhexe
4-Ilyaas Sheekh Cali---------Laga saarey golihii dhexe
5-Yuusuf Maxamed Mubaarak--Laga saarey golihii dhexe

Dhinaca kale waxaa nasoo gaaray magacyada 5 xubnood oo markii hore sugayaal gole dhexe ahaa oo lagu badalay xubnahaas qaarkood magacooduna waa sidan;

1- A/raxmaan Jiis
2- Faysal Daahir Nuur
3-C/qaadir C/laahi Gamaadiid
4-Axmed Majeerteen
5-Maxamed Yuusuf

Isbedalka weyn ee lagu sameeyay golaha dhexe ee ururka ONLF ayaa dadka qaar u arkaan mid keeni karta iska hor imaad iyo kala jab kuyimaada ururka dhexdiisa. Iyadoo durbaba ay soo baxayaan daldaloolyo laxiriira qaabka lagu eryay xubnahan inaysan waafaqsanayn qawaaniinta ururka, isla markaasna ay kahor imaanayso heshiiskii lagu gaaray shirkii golaha dhexe ee kan kahoreeyay.

Heshiiskaas oo sheegayay "inaan golaha dhexe ee ururka qofna lagusoo dari karin lagana saari karin, ilaa iyo inta laga qabanayo shirweynaha guud ee ururka oo maamul cusub lagu dooran doona."

Guud ahaan Golaha dhexe ee ururka ONLFta ayaa kakooban 51 xubnood oo meelo kala gedisan jooga. Hadii larabo inay wax laga badalo golaha dhexe ururka waxaa qasab ah in meesha wax lagu badalayo ay ugu yaraan joogaan 26 xubnood . Balse taas madhicin oo waxaa meesha joogay 13 xubnood oo kaliya, isla markaasna 11 xubnood kasaaray golihii dhexe oo labo kamid ah ay meesha joogeen.

Micnuhu waxaa weeye 11 xubnood oo gole dhexe ah ayaa 11 xubnood golihii dhexe kasaaray oo qaarkood shirka joogeen.

Iskusoo dudooboo qaabka iyo sida loo sameeyay isbedalkan ayaa wali fasiraadyo badan laga bixinayaa iyadoo dadka qaar ay leeyihiin waa waxaan macquul ahayn in 11 xubnood ay eryaan 11 xubnood oo kale.

Meesha qaar kalena ay leeyihiin " Waa sax in mararka qaar sharciga laga leexdo si ujeedada ururka loo gaaro. ONLFna uma baahna dad magac uyaal ah oo inta badan maleegaya jilaabatooyin lagu kala qaybinayo xubnaha ururka."

P.S: Godeynews waxay raali gelin ka bixinaysaa qayb kamid ah qoraalkaanigii hore oo dib markaan u baarnay khalad noqday.

Waxaan dib ka ogaanay inay been tahay in Prof Maxamed Wali Cabaas iyo Sulub Cabdi Axmed laga saaray golaha dhexe ee ururka, labadan xubnood magacooda ayaan ku khaladnay kuwa kale oo ay isku magac dhow yihiin.

Godeynews Staff,
[email protected]