Home | Submit News | Forum | Contact

Ciidamada maxaakiimta islaamiga oo aad u fara badan watana 70 gawaarida dagaalka ayaa waxaa illaa iyo shalay kusugnayaan degmada Jilib, kadib markii ay shalay magaalada kacarareen maleeshiyaadkii dooxada jubba oo hadda kahor joogi jirey.

Ciidamadaas maxaakiimta ee hore ayaa waxaa saaka subixii kusii biiray oo dib kasoo gaaray kolonyo 55-60 gawaari dagaal ah oo u horkacayo sheekh xasan Turki kana tarsan ciidamada goonida ah ee AL-SHABAAB.

Wararku waxay intaas kudarayaan Sheekh Xasan ayaa markuu magaalada soo galey dadweynaha kula hadlay meel fagaare ah ugana mahad naqay sida wanaagsan ay u qaabileen ciidamada maxaakiimta iyo waliba sida wanaagsan ay utaageersan yihiin kudhaqanka shareecada islaamiga iyo kahortaga ciidamo shisheeya oo dalka soo gala.

Dhinaca kale xiriir ay Godeynews lasameysay xog-ogaal kusugan magaalada Kismaayo ayaa waxay sheegayaan in maleeshiyada Barre Hiiraale ay magaalada kasii qaxayaan iyagoo sii bililiqaysaaya waxkasta oo ay qaadan karaan intoodii hartayna iskusii uruurinaya dhinaca Airportka Kismaayo oo magaalada qiyaastii ujira 12km.

Awooda ciidamada maxaakiimta islaamiga ayaa waxay soo baxday oo si fiican loo ictiraafey markii ay magaalada muqdisho iyo nawaaxigeeda xooga uga saareen inkabadan 11 qaqable dagaal oo kamid ahaa qabqablayaashii dagaalka uga darnaa ee inta badan dhibaateynayay shacabka soomaaliyeed, isla markaasna hortaagnaa isku dayitaanadii dawladeed ee lagu goobayay dib usoo celintii qarankii soomaaliyeed ee burburay.

Iskusoo duboo sida muuqata Barre Hiiraalle ayaa kusocda jidkii saxaabadiis oo hadda kahor baryo iyo sasab soomaali kukeri weyday, markii danbana xoog iyo awood looga saarey deegaanadii ay sida xaaraanta ah uga talin jireen.

Kuwaasoo oo dhamaantood maanta ay kajiraan maxaakiim islaami ah oo dadka kumaamusha shareecada islaamiga, isla markaasna soo celisay amaankii iyo nabadii magaala madaxda Muqdisho. Taasoo sahashay in dib loo furo adeegyadii waweynaa sida dekadii weyneed iyo Airportkii caalimiga ahaa oo xirnaa 6kii sano ee dagaalka ehliga socday.

C/laahi Sheekh,
Godeynews.com.