Home | Submit News | Forum | Contact

Warsidaha Godeynews waxaa loo xaqiijiyay inay dhabtahay in Halgame Suldaan Yuusuf Aden Taani oo kamid ahaa golahii dhexe ururka ONLF iyo ciidamo kale oo katirsan jabhadda ONLF oo tiro ahaan lagu qiyaasay illaa iyo 100-150 inay wada hadal dheer kadib ay isu dhiibeen dawladda Ethiopia oo ay muddo dheer dagaal kula jireen.

Waxaa dad xog-ogaal ah oo arintan kudhex jira noo sheegeen inuu Halgame Taani uusan si raqiis ah isusoo dhiibin, balse uu masuuliyiin kamid ah dawladda Ethiopia layeeshay wadahadalol meello badan taabanaya oo shuruudo badan kuxiran yihiin.

Sida Godeynews loo sheegay markii Halgame Taani laga ogolaaday dhamaan shuruudihiisii ayuu kadib go,aansaday inuu gudaha soo galo si uu usii dhamaystiro waxii wada xaajood ah ee isugu haray iyaga iyo masuuliyiinta kuhadlaysay magaca dawladda Ethiopia.

Qodabada ugu waaweyn ee labada dhinac kawada hadleen ayaa Godeynews loogu sheegay inay yihiin sidan;

1- In ciidamada milatariga lageeyo xuduudada, isla markaasna laga saaro gudaha magaalooyinka waaweyn ee ismaamulka soomaalida

2- In dib loosoo celiyo dhamaanba waxii miisaaniyada ah ee hadda kahor lagu sheegay inay dhacday dawladda Dhexena loo celiyay taasoo lagu qiyaasayo in kabadan 15-20 billion birr. Lacagtan hadii lahelo waxay wax katari kartaa dib udhiska iyo dib u noolaynta waxyaabaha aasaasiga ah ee bulshudu u baahan tahay

3- In lakala diro masuuliyiinta maamulka Kililka si dib loogu dhiso maamul cusb oo kudhisan cadaalad, sinaan iyo wax qabad

Sida lasheegayo Halgame Taani oo kuhadlayay magaca ururka ONLF qeyb kamid ah ayaa wadahadalkan kujiray muddo dheer, isla markaasna xiriiryo badan oo kala gedisan lasameeyay xafiisyada dawladda Ethiopia kuwooda ugu sareeya.

Sababaha keenay inuu arinkan kudhaqaao Halgame Taani ayaa in badan oo isaga kudhow dhow kusheegeen inuu ururka khilaaf weyn soo kala dhex galay, kaasoo ka bilaamay siyaasadii lagula midoobayay 6dii urur ee ay kujireen ururada Axmaarada iyo OROMADA, Siyaasadii ururka oo kudhex milantay ururada soomaaliya isku haya qaarkood iyo waliba khilaafkii ugu danbeeyay ee kadhashay isbedalkii 11 xubnood xilka laga qaaday oo aan illaa iyo hadda laisku afgaranin.

Masuulkan ayaa lashegayaa inay lasocdaan ciidamo kale iyo masuul kale oo isaguna kujiri jiray golaha dhexe ururk onlf laakiin aan magaciisa helin. Imaanshaha masuuliyiintan ayaa aad looga dareemay guud ahaan ismaamulka soomaalida gaar ahaan gobalka Wardheer oo ay kusoo horeeyeen imaanshahoodana aad looga soo dhaweeyay.

Waxaa kaloo Godeynews looo sheegay inay usoo gudbeen dhinaca magaalada Qabridaharre, kadibna ay diyaarad kasii raacayaan una sii gudbayaan magaalada Addisababa si ay kulan ula yeesheen masuliyiin kasocda xafiiska Raisul wasaaraha dawladda Ethiopia oo markii horeba hawsha bilowgeeda aas-aas u ahaa.

Iskusoo duuboo heshiiskan qaar kamid ah xoogaga JWXO iyo qeyb kamid ah masuuliyiinteeda ay lagaleyaan dawladda Ethiopia ayaan ah mid salka kuhaysa khilaafka soo kala dhexgalay xubnaha sarsare ee ururka oo ay mudaba kadhex taagnayd awood maroorsi iyo is haysasho keentay in ururkii ONLF u kala jabo dhowr qeybood oo is khilaafsan.

Hase yeeshe dadka u dhuun daloola siyaasadda dawladda Ethiopia ayaan rajo badan kaqabin inuu wax rasma ah kadhasho wadahadalkan ay xubnahan kuxaroodeen,isla markaasna ay adeg tahay in wax kahirgeli karo xilli aysan deganayn siiyaasadda dawladda Ethiopia.

Wariyaha Godeynews ee magaalada Jijjiga ay kuhawlan sidii uu usoo uruurin lahaa waxii xog dheeraad ah ee khuseeysa xubnahan ONLFta.

Axmed Cilaan,
Godeynews.com
Jijjiga.